Isaac Sierra Longo, unu de los intérpretes más destacaos de la canción asturiana

El cantante llamenta la desapaición de munchos concursos de tonada

Poco s'imaxinaba'l parragués Isaac Sierra que cuando, de neñu, escuchaba cantar tonada en casa a so güelu maternu o a so padre, dalgún día él diba convertise nuna de les voces de referencia dientro del mundu de la canción asturiana. Llegó a él fai daqué más de diez años por más que la pasión llevábala dientro dende muncho primero.

Aquel rapaz roxu, a quien so padre-y regaló una cinta de tonada, la primera d'una colección qu'él nun dexó d'ampliar y que yá cantaba en casa, acabó buscando quien lu formara y púnxose en manes del que foi'l so maestru, Narciso Fernández Arduengo.

A los sos 38 años suma más d'una ventena de primeros premios, dalgunos en concursos tan afamaos como'l de Xixón o La Nueva, en Llangréu y que ganó en más d'una ocasión. N'otros munchos quedó segundu. El problema, asegura, ye que cada vez hai menos concursos.

Isaac va siguir concursando ellí onde puea y, nunos años, la so ilusión ye grabar el primer discu de la so carrera sofitáu pol so maestru.

Pasión pola tonada, toa; con ídolos como'l Presi, Botón, Xuanín de Mieres, Cuchichi o'l Abogau, pero Sierra tien bien claro que la canción asturiana necesita ampliar y anovar el repertoriu.

Respecto al futuru de la tonada tien claro que per detrás vien xente bien nuevo, a los que tamién ta ayudando a formase y que, ensin ser munchos, tienen un gran nivel.

Como un bon intérprete tien que dominar tolos palos, Isaac esfuérzase col cantar ayerán, la modalidá de tonada más difícil y entrena l'oyíu a diario escuchando munchos cantares. Tamién ensaya, cantando clásicos como 'A la salida del Seya'.