La familia d'Inmaculada Adeba cría y esporta caballos per tol mundu

Rexenten l'Hotel Yeguada Albeitar, acomuñáu al mundu de la hípica y al turismu rural

El destín profesional, como albeitre o veterinariu rural de Benito, home d'Inmaculada Adeba, llevólos a Oneta, Villayón, fai una trentena llarga d'años. Una etapa con escasos momentos d'ociu que decidieron ocupar cola compra d'un caballu de raza árabe. Darréu mercaron una yegua, empezando asina la cría d'estos animales.

Col tiempu entró-yos l'enfotu del saltu y foi cuando empezaron con caballos deportivos españoles hasta cuntar anguaño con 15, amás d'un bon númberu de potrinos.

Caballos que son la punta de llanza d'un proyectu qu'empezó a crecer pol enfotu de los sos fíos en da-y continuidá. En 2006 diversificaron la so actividá cola creación del Hotel Yeguada Albeitar, un hotel acomuñáu al mundu de la hípica y al turismu rural.

Siguiéron-y la cría de 700 cabres de lleche y vaques angus pa producción cárnica de 'kilómetru cero', cabres bermeyes o una pequeña esplotación apícola. Una realidá qu'una vegada foi una ilusión.

Un proyectu exemplu d'enfotu y ciñu pol mediu rural, nun allugamientu que vuelve afitar la necesidá d'apostar pola Asturies alloñada de les grandes urbes.