Les empreses asturianes caltienen la so organización pese al encamientu de teletrabayar

La Universidá d'Uviéu va caltener les actividaes presenciales que considere necesaries

El resolvimientu asoleyáu nel Boletín Oficial del Principáu pola Conseyería de Salú del Gobiernu asturianu pa evitar la espansión de la pandemia del coronavirus n'Asturies afita que se prioricen les posibilidaes del teletrabayu y va valorase la formación telemática non presencial na Universidá.

Nel restu de centros educativos va actuase según lo afitao nos protocolos vixentes suspendiendo l'actividá presencial solamente naquellos casos previstos nos mesmos, señala la norma.

L'encamientu, ¿va suponer que más xente trabaye dende casa? La mayor parte de les empreses consultaes nun van faer más cambeos sobro los planes actuales.

En delles empreses llegóse a teletrabayar prácticamente al 100%, como en Seresco y agora les oficines presenciales ta aproximadamente a la metá d'ocupación.

Una situación similar a la que se vive en GAM. Nel confinamientu mandóse a tol personal d'oficina a casa. Esto sirvió pa normalizar que'l trabayu ye posible, pero anguaño solo tán fuera de la oficina'l 15-20% y nun planteguen camudalo.

El teletrabayu entró con fuerza en compañíes tan presenciales como Arcelor. Nel confinamientu unu de cada cinco trabayadores siguieron cola actividá en casa y a partir de xunetu empezó'l plan de torna, que van caltener pese l'encamientu del BOPA. La metá de la xornada faise en casa y la otra metá na oficina, a lo que s' amiesten los díes d'ERTE.

Telefónica ye pionera en teletrabayu. Esta selmana empezó'l plan d'incorporación presencial, un regresu a les oficines, qu'afirmen va poder adaptase nun futuru.​

La Universidá d'Uviéu va caltener les actividaes presenciales que considere necesaries

La Universidá d'Uviéu va analizar esta tarde, nun alcuentru telemáticu, los encamientos de Salú, que plantega optar pol teletrabayu y la docencia online.

Va analizase cada facultá y les decisiones van adoptase, aseguren, de forma gradual. Pero dende la institución académica yá dexen claro que, na midida de lo posible, siguirá optándose pola presencialidá, al considerar que ye lo que garantiza la meyor formación del estudiantáu.