Los conceyos van salir abondo más caros a los asturianos que va cuatro años

Les mayores xubes tán nos conceyales lliberaos y en conceyos de tamañu mediu y pequeñu

Toca actualizar sueldos, dietes y lliberaciones. Frente a la contención de va cuatro años, destaca la medría actual.

Ente 2015 y 2019, el costu de la vida encarecióse un 3,9%. El sueldu de los alcaldes xube mui percima.

El casu más notable ye'l de Siero con una xuba de 14.000 euros respecto al salariu de 2015. L'alcaldesa de Xixón, Ana González, va ser la que más cobre y la d'Avilés, la segunda.

Los alcaldes d'Uviéu y Mieres, al tar xubilaos, nun van cobrar. Llangréu ta pendiente de diseñar los sueldos.

Sicasí, los casos más llamativos tán n'otros conceyos, como Sotu'l Barcu y El Franco con malapenes 4.000 habitantes y sueldos que raspien los 40.000 euros o xubíes del 10%.

Nel llau opuestu, Cuideiru y Tinéu. Los rexidores van cobrar menos, anque nel casu del segundu pola perda de población y conceyales.

Los sueldos dispárense colos conceyales lliberaos y les xuntes de gobiernu al respective de va cuatro años, anque en dellos casos nun van cobrar dietes.

En Siero pasen de percibir cuasi 24.000 euros en 2015 a 36.000, y en Mieres van pasar a cobrar 8.000 más con xubíes superiores al 25%.

Los conceyales meyor pagaos van ser los de Xixón, 58.600 euros, siguíos de los d'Uviéu con presencia nel gobiernu municipal, 52.000. N'Avilés, el so sueldu aumenta un 6%.

La próxima selmana, Siero, Uviéu y Xixón van aldericar los sueldos nos sos plenos.