Mieres llora la muerte del axente de Guardia Civil Ángel Antonio Ambrosio

Tono, como lu llamaben los sos conocíos, sedrá incineráu mañana nel tanatoriu mierense

Mieres llora la muerte n’accidente de tráficu del axente de la Guardia Civil Ángel Antonio Ambrosio Barbero, arrolláu por una furgoneta mientres participaba, ayeri, nun control pol pieslle perimetral del conceyu. Tono, como lu llamaben los sos conocíos, sedrá incineráu mañana nel tanatoriu mierense.

La vida foi tan caprichosa con Tono que lu llevó a Laredo nos años duros d’ETA, a Llíbanu díes enantes d’una españíu que semó de muertos la guapa ciudá de Beirut, a la tráxica valla de Ceuta les pasaes navidaes y a la muerte ayeri xunto a so casa, nel so queríu Mieres, cuando participaba nun control de la Guardia Civil pol pieslle perimetral del conceyu por mor de les restricciones del COVID-19.

Ángel Antonio Ambrosio Barbero entró nel cuerpu mui mozu, va cuasi 30 años, siendo un chaval al que-y fascinaba’l baloncestu, deporte que practicó nel Colexu Santiago de mano y nes categoríes inferiores del Hunosa dempués, y con sentimientu fonderu de xusticia.

Dicen los que lu conocieron qu’odiaba la picaresca y l’engañu, viniere d’ónde viniere. Lo d’entrar nes fueces de seguridá con namás 18 años foi una opción qu’en so casa nun asustó. So padre, Lancharro, ye un renomáu Policía Nacional de Mieres, cuerpu nel que tamién ta’l so hermanu Hugo.

Va unos díes, Tono, con esi aire graciosu y non irónicu que lu caracterizaba, bromiaba nun chat colos sos collacios de tola vida, dempués de los terremotos de Granada, que namás-y faltaba que cayere un meteoritu nes sos cabeces.

El meteoritu llegó-yos ayeri a ellos, cola peor de les noticies, porque Tonín yá nun podrá quedar nesa cena que quedó pendiente, como tantes coses, esti añu.