Multa a un entrenador de fútbol por unviar un videu pornográficu a un xugador de 14 años

Asturies rexistró 72 delitos escontra la llibertá sexual nel primer semestre de 2017

Multa de 1.000 euros pa un entrenador d’equipos infantiles de fútbol qu’unvió un videu pornográficu a unu de los sos xugadores, de 14 años. Esta mañana, n’Avilés, l’acusáu llegó a un alcuerdu cola Fiscalía dempués de reconocer los fechos y acepta la multa como condena por un delitu de provocación sexual.

L’acusáu reconoció que, en calidá d’entrenador, unvió a unu de los sos xugadores, un videu nel qu’interveníen mayores d’edá faciendo conductes sexuales esplícites.

Asturies rexistró 72 delitos escontra la llibertá sexual nel primer semestre de 2017

Según los últimos datos asoleyaos pola Secretaría d’Estáu de Seguridá del Ministeriu de Interior, nel primer semestre de 2017, Asturies rexistró 72 delitos escontra la llibertá sexual. Cerca d’un 3% más que nel mesmu periodu de 2016, cuando se rexistraron 70 casos.

Los más de los delitos tienen que ver con abusos sexuales, pornografía infantil y agresiones. Un total de 64 casos d’esti tipu contabilizáronse en 2017, cerca d’un 5% más que nel mesmu períodu del añu anterior. Baxaron, sicasí, llixeramente, les agresiones sexuales con penetración. Ocho rexistráronse ente xineru y xunu de 2017, frente a les nueve de 2016.

Dende xineru del añu pasáu los delitos escontra la llibertá sexual tienen un apartáu específicu dientro del balance de criminalidá.

Dellos colectivos, ente ellos los forenses, alertaron n’abondes ocasiones de que se ta rexistrando una medría d’esti tipu de delitos, sobre manera, ente la mocedá.

El Principáu ta trabayando yá nun protocolu escontra les agresiones sexuales que quier tener preparáu enantes del branu.