Refuxaos afganos en Xixón

Accem trabaya n'Asturies pa meyorar la calidá de vida de les persones abellugaes

Nunu de los aviones fletaos pol Gobiernu español salieron fuxendo d'Afganistán, n'agostu del pasáu añu, Amir Khan y la so familia, y dende entós, viven en Xixón. El cabeza de familia, de 56 años, trabayaba na embaxada española y acoyóse a la protección internacional tres la llegada al poder de los talibanes.

La familia Khan llegó a Xixón el 25 d'agostu col sofitu d'Accem, que dende entós ta dándo-yos el soporte pa que l’adaptación-yos seya más cenciella. Mui agradecíos cola entidá, los Khan reconocen que lo más difícil ta siendo deprender l'idioma, al tener un alfabetu mui distintu. Menos problemes col idioma tán teniendo'l so fíu de 14 años y el so nietu d'ocho.

Dempués d'años somorguiaos nuna guerra, Amir Khan ta feliz cola tranquilidá qu'atoparon en Xixón, onde confía en refacer la so vida, mientres s'adapten a una cultura distinta, nuna comunidá onde malapenes tienen compatriotes.

Una solombra de murnia apaez nos sos güeyos cuando fala de la familia que quedó atrás, ente ellos los padres y los hermanos del nietu que vino con ellos. Confíen en que nel futuru puean facer equí la reagrupación familiar.

Accem trabaya n'Asturies pa meyorar la calidá de vida de les persones abellugaes

Un total de 150 profesionales, ente los qu'hai sicólogos, trabayadores sociales o xuristes, encárguense n'Accem Asturies de dar sofitu al refuxáu. Lo primero ye siempres l'atención sicolóxica.

Accem moviliza tolos recursos disponibles p'ayudar col idioma, colos trámites xurídicos de la protección internacional y, tamién, col inxertamientu llaboral.

Pa que puean sentise como ciudadanos de plenu derechu, reciben tamién formación sobre la sociedá d'acoyida.

Nel pasáu añu, Accem atendió a más de 700 solicitantes de protección internacional n'Asturies​.