Restauradores d’horros piden un censu y más facilidaes pa nuevos usos

La propiedá compartida y la falta d’usu son dalgunes de les razones qu’espliquen el so deterioru

El finamientu d’una muyer en Piloña dempués de cae-y enriba l’horru sol que tendía la ropa abrió otra vuelta’l debate al rodiu del abandonu que sufren estes construcciones tradicionales de les que, ensin un censu oficial, créese qu’hai daqué más de 20.000 en toa Asturies.

La propiedá compartida y la falta d’usu son dalgunes de les razones qu’espliquen el progresivu deterioru d’estes construcciones tradicionales. Los que los restauren piden menos torgues burocrátiques a la hora d’autorizar tanto la so reparación como’l so treslláu y defenden el so usu residencial.

Pensaos pa durar, prueba d’ello ye que los hai con dellos sieglos d’antigüedá, la verdá ye que por mui estropiáu que tea, un horru aguanta munchu tiempu enantes de cayer y acabar convertíu nuna ruina.

Colectivos como l’Asociación d’Amigos del Horru Asturianu y espertos llamenten que nun haya un censu actualizáu, un documentu que ven esencial pa saber cuántos horros hai n’Asturies y qué exemplares merez caltener. Los restauradores demanden una ampliación d’usos, facilidaes pal so treslláu y axilidá a la hora d’autorizar la so reparación.

La progresiva desapaición de los horros asturianos sigue imparable y, a pesar de les restauraciones que s’afronten, hai horros que, por desgracia, yá son historia.