Un enzarru n'Educación esixe la carrera profesional pa docentes

Recuerden que'l Principáu dio anuncia de seis millones d'euros en 2020, pal segundu tramu del Plan d'Evaluación

Nueve delegaos sindicales d'ANPE y UXT entamaron un enzarru esti martes nes dependencies de la Conseyería d'Educación pa esixir l'inxerimientu nos presupuestos del Principáu de 2020 d'una partida p'acometer el segundu plan d'evaluación y evitar asina que los docentes seyan discriminaos frente a otros funcionarios públicos.

Según dambos sindicatos, la educación pública asturiana ye namái una prioridá nos discursos políticos y calificaron de “inaceptable” l'anteproyectu de llei que, na so opinión, torga'l desendolcu de la so carrera profesional.

ANPE y UXT roblaron en payares de 2009 l'alcuerdu que punxo en marcha'l Plan d'Evaluación docente, qu'afita'l compromisu del Principáu a que la evaluación de la función docente siga un percorríu paralelu, en plazos y cuantíes económiques, al previstu pa la carrera profesional del personal funcionariu y llaboral, hasta l'inxerimientu total de los funcionarios docentes.

Los planes d'evaluación de la función docente concebiéronse como parámetros de funcionamientu y midición del sistema educativu asturianu al traviés de la reconocencia y la evaluación de la función que desendolca'l personal docente.

Amás, recordaron que'l 8 de payares pasáu'l Principáu dio anuncia d'una partida presupuestaria de 6 millones d'euros en 2020 pal segundu tramu del Plan d'Evaluación, que pondría fin a la discriminación col personal docente.