Uviéu y Siero baldien agua peles cais pa desaniciar los efectos de la contaminación

El Principáu amplía a dellos conceyos de les cuenques mineres el protocolu

Nivel preventivu nes Cuenques, más concretamente en Mieres, Llangréu, Samartín del Rei Aurelio y parte de L.lena, dempués de qu'en dos de les tres estaciones de midida de contaminación se superaren los valores nos últimos díes.

La Dirección Xeneral de Calidá Ambiental alvirtió a les empreses potencialmente contaminadores que curien l'impactu ambiental que pue tener la so xera.

Encamiéntase que n'adultos o neños con problemes respiratorios, patoloxíes cardiaques y muyeres embarazaes, s'amenorgue l'actividá física si s'esperimenta dalgún malestar.

Pela so parte, operarios del Conceyu d'Uviéu y Siero baldiaron les cais p'amenorgar los niveles de contaminación, sobre manera nos accesos a la capital per Ventanielles. Si nes próximes hores llueve, va suspendese'l protocolu y nun se va decretar el nivel 1.

Estes operaciones nun afectaron al tráficu, que se caltuvo regular y ensin restricciones. Anque, dende'l Conceyu d'Uviéu encamienten utilizar el tresporte públicu y compartir vehículu.

En Xixón pue vese la 'boína' de contaminación sobre la ciudá. La Federación de vecinos denunció la inacción del Gobiernu del Principáu.

Asegura que les emisiones, sobre manera de partícules PM10, son mui elevaes. Tanto qu'en seis díes consecutivos delles estaciones superaron los valores afitaos.