Adif ve cerca el final del suañu que supunxo la Variante de Payares

Pardo califica de "auténtica maraviya tecnológica" el montaxe de vía

La presidenta d’Adif, Isabel Pardo de Vera, señaló esti vienres que l’añu qu’entra acabarán les obres de la Variante de Payares y entamará’l periodu de pruebes de la infraestructura poro, ve cerca’l final del “suañu” que supunxo’l proyectu pa los técnicos non solo pola dificultá técnica sinón tamién pola planificación.

En declaraciones a los medios nel I Congresu d’Empresaries y Directives del Atlánticu (EDA), Pardo dixo que’l montaxe de vía, que calificó de “auténtica maraviya tecnolóxica”, va per mui bon camín y que too fai indicar que les obres tarán acabaes l’añu que vien.

Sicasí, resaltó los avances de la compañía en materia de tresparencia y invitó a la ciudadanía a visitar unos trabayos “que merez la pena” velos, y qu’evidencien que “ta too en marcha” na construcción de dos túneles de 25 kilómetros qu’afuraquen El Cordal Cantábricu y que, dempués quince años d’obres, supunxo una inversión de más de 3.500 millones d’euros.