Alberto Campa escribe’l so primer llibru de viaxes 'Una vuelta al mundo bajo cero'

La obra recueye la so primer aventura solu travesando zones xelaes del planeta

Dempués de tres vueltes al mundu’l polesu, Alberto Campa, escribe´l so primer llibru de viaxes. 'Una vuelta al mundo bajo cero' recueye la so primer aventura solu fecha n’iviernu y travesando zones xelaes del planeta.

Entamó a viaxar porque´l so oficiu taba rellacionáu colos viaxes. Axente y guía sabía qu’otra forma de conocer mundu yera posible. Viaxar p’Alberto Campa ye’l sueñu más guapu que se pue cumplir, y el primer suañu acabó nesti llibru.

Llánzase a l’aventura colos visaos afayadizos pa entrar nos países, porque asegura que la mochila faila’l día enantes. Y asina, llixeru d’equipaxe, déxase sorprender por otres cultures

Convivió con nómades en Mongolia a 35 graos baxo cero, la llende de supervivencia del ganáu que pastoriaben, durmió nel Transiberianu, y llegó a dormir en Xapón nun armariu, y con compañía.

Falten otros dos viaxes, y otros dos llibros. Y quien sabe qué otres aventures pa un viaxeru que siempre vuelve a los sos raigaños asturianos.