Aplicar la nueva Llei d'Universidaes costará ente 2 y 3 millones al añu​

La Universidá llanzará yá un concursu d'idees pa diseñar el futuru campus d'El Cristo

El rector de la Universidá d’Uviéu, Ignacio Villaverde, piensa qu’aplicar la nueva Llei d’Universidaes costará a la institución ente dos y tres millones d’euros al añu, una cantidá que, según Villaverde, ye inasumible. La entrada en vigor de la norma esti mes de marzu ye’l retu cimeru del rector yá nel ecuador del so mandatu.

Hasta un 40% podríen sufragalu al traviés del marcu financieru a seis años acordáu col Principáu, pero faltaría’l restu. Dineru pa poner en marcha, ente otros, los cambeos nes figures del profesoráu que recueye la llei. Quedarán hores vacantes al menguar la dedicación máxima de docentes como los profesores asociaos.

La norma tamién obliga a dedicar un mínimu del 5% del presupuestu añal a investigación. Nel casu de la d’Uviéu sedríen diez millones d’euros, inviable según Ignacio Villaverde.

La Universidá llanzará yá un concursu d’idees pa diseñar el futuru campus d’El Cristo

La Universidá llanzará yá un concursu d’idees pa diseñar el futuru campus d’El Cristo. Pa ello tienen una partida de 200.000 mil euros y l’oxetivu del rector ye presentar el proyectu en seronda.

Nes instalaciones del antiguu HUCA dispondrán de 30.000 metros cuadraos pa llevar ellí les facultaes de ciencies, educación y inxeniería informática.

Pal desendolcu d’esta operación, la Universidá d’Uviéu collabora, ente otres instituciones, col Ayuntamientu d’Uviéu. Les rellaciones, según el rector, son escelentes.

El presidente del Principáu tamién faló del ecuador del rectoráu de Villaverde. Adrián Barbón agradez l’impulsu al Campus de Mieres y asegura que l’Executivu intenta acelerar los plazos pa que la reorganización d’El Cristo seya una realidá.​​