Arcelor abre’l sínter A anque nun acabaren les obres

El 8 de xineru los trabayadores de l’acería d’ArcelorMittal en Xixón votarán el plan de viabilidá

La dirección y los sindicatos d’ArcelorMittal volvieron a aconceyar pa negociar el plan de viabilidá de l’acería de Xixón, dempués d’algamar alcuerdos n’otres instalaciones. La compañía menguó’l númberu de puestos de trabayu que plantea amortizar y asegura carga de trabayu tanto pa l’acería, como pa los trenes de carril y alambrón.

Güei la empresa dio anuncia de los sindicatos qu’a entamos d’añu, el día 4 de xineru, vuelve a ponese en marcha’l sínter A en Xixón. La medría de la producción obliga a echar mano d’esta instalación, parada dende abril, onde se trata’l mineral de fierro enantes de pasar a los altos fornos. Un arranque que necesitó d’un cambéu na autorización ambiental de la factoría.

La producción ta meyorando y ArcelorMittal necesita procesar más cantidá de mineral de fierro colos dos fornos funcionando. El sínter A ponse en marcha, pero nun acabó la instalación del filtru de mangues que mengua les emisiones contaminantes. Esta obra, que lleva más d’un añu de retrasu por diferencies ente la inxeniería y les empreses de montaxe que trabayen nella, va acabar en marzu.

Colos dos sínteres, A y B, funcionando, la siderúrxica tuvo que pidir un cambéu de l’autorización ambiental inxerta pa cumplir coles llendes d’emisiones. En concreto, el Principáu autorizó un cálculu alternativu de valor mediu diariu, y non cada sínter por separtao, que garantice una protección ambiental equivalente.

Cuando’l sínter A algame’l ritmu de producción afayadizu, piénsase parar el B por caltenimientu.