Asociaciones de familiares y pacientes piden una llei sobre’l derechu a morrer dignamente

El testimoniu de Fernando Cuesta en TPA pon otra vuelta’l focu na regulación de la eutanasia

El testimoniu de Fernando Cuesta, el xixonés afectáu con ELA que finó en Suiza por suicidiu asistíu, y que contamos en TPA estos díes, volvió a poner el focu na regulación de la eutanasia.

Falamos cola 'Asociación Derecho a Morir Dignamente', y con ELA Principáu. Comparten un mesmu derechu: el de poder decidir si vivir o morrer, siempres con dignidá.

Pa la 'Asociación Derecho a Morir Dignamente', ye urxente una llei d’eutanasia que dea rempuesta al derechu de los que yá nun quieren siguir viviendo con un sufrimientu irreversible.

Derechu a morrer, o a vivir, pal que l’asociación ELA Principáu reclama más garantíes. Penriba de too, recalquen, el derechu a decidir.

Derechu a decidir que ye fundamental pal xixonés Arturo Rodríguez Ollero. Tien 44 años, y dende va nueve, vive con ELA. El so principal motor, diz, ye ver medrar a los sos dos fíos; pero reivindica’l derechu a poder decidir cuándo morrer, y a facelo en casa, cola so familia.

Dende avientu, Arturo comunícase al traviés d’esti ordenador que controla cola mirada. Los güeyos son la única parte del cuerpu que pue mover.

La so familia, diz, ye clave pa vivir. Ellos y los collacios organícense p’atendelu tol tiempu. Pero la so mente sigue lúcida. Esa ye, la so razón de ser.

Sobre la necesidá de regular esti asuntu, el grupu parllamentariu popular n’Asturies namái diz que ye daqué que tien que decidise a nivel nacional.

Per parte de so, Ciudadanos considera impresdincible dir a dalgún tipu de regulación, anque siempres dende’l consensu.