Asturies dexa de dar llicencies pa l’apertura de sales d’apuestes

Nel Principáu hau 36 locales de xuegu y apuestes

El Gobiernu del Principáu decidió suspender ocho meses la concesión de nueves llicencies pa l’apertura de nuevos establecimientos de xuegu al disparase les solicitúes nel primer trimestre del añu.

Frente a una media añal de cinco solicitúes, ente xineru y febreru recibiéronse nel Serviciu de Xuegu de la Dirección Xeneral d’Interior 47 pidimientos d’apertura, de los que 44 cumplen los requisitos previos.

Énte esta xuba, el Conseyu de Gobiernu acordó na xunta d’esti martes afitar una moratoria d’ocho meses, hasta payares, tiempu nel que se fadrá un nuevu decretu con criterios más restrictivos p’autorizar esti tipu de locales.

Según el portavoz del Gobiernu y conseyeru de Presidencia, Guillermo Martínez, l’oxetivu ye poner una llende enantes de qu’haya situaciones como les que se dan en Cataluña y Murcia, que tamién dexaron de dar nueves llicencies.

Sicasí, señaló que la situación ye mui diferente porque mientres en Murcia s’afitó esa midida cuando yá teníen 565 locales de xuegu y apuestes, n’Asturies la cifra ye de 36.

En concreto, anguaño hai abiertes n’Asturies, sobre manera nes grandes ciudaes, 22 salones recreativos, siete locales d’apuestes, seis bingos y un casinu.

Estes cifres asitien Asturies ente les comunidaes autónomes con menos locales de xuegu, tanto en términos absolutos como en rellación a la población.

Ludópates Asociaos en Rehabilitación del Principáu d’Asturies (Larpa) alertó nos últimos meses de la xuba de menores de 30 años adictos al xuegu, que suponen yá’l 37% d’afectaos que van a les terapies de la so asociación.