Asturies afitará en 150 metros la distancia de seguridá de pueblos a viesques

El Gobiernu abordará darréu les ayudes pa les zones afectaes pola fola d'incendios

El presidente del Principáu, Adrián Barbón, dio anuncia güei de que va proceder a reformar y reforzar los medios y trabayos que lleva alantre la guardería rural pa prevenir meyor los incendios forestales y que se doblará, de 75 a 150 metros, la distancia de seguridá ente’l perímetru de los pueblos y les viesques.

Barbón fizo esti anunciu dempués de visitar, xunto al ministru de la Presidencia, Rellaciones coles Cortes y Memoria Democrática, Félix Bolaños, dalgunes zones arrasaes pol fueu en Valdés, conceyu costeru del occidente d’Asturies más afectáu pol fueu y nel que güei hai dos fueos activos nos que tán trabayando dos helicópteros y personal de Bomberos d’Asturies.

Con independencia de les ayudes que puea dar l’Estáu, el presidente del Principáu señaló que les de la comunidá autónoma tienen que dir dirixíes a compensar los estrozos de bienes personales y a una reforestación que dexe al marxe la especulación, porque "nun se va permitir que los tarrenes forestales quemaos puean dedicase a otra cosa".

El ministru de la Presidencia, Rellaciones coles Cortes y Memoria Democrática, Félix Bolaños, aseguró güei que’l Gobiernu central tien voluntá d’abordar "darréu" la declaración de zona catastrófica pa les zones afectaes pola fola d’incendios que sufrió Asturies y que, según cálculos iniciales, calcinó unes 20.000 hectárees de monte.