Asturies reparte sal

La prioridá ye restablecer les comunicaciones con Madrid

La imaxe de la solidaridá d'Asturies cola ivernada que se sufre en Madrid: camiones cargaos de sal p'ayudar a restablecer la normalidá na capital.

El Principáu da 270 tonelaes de sal qu'empiecen a viaxar en 10 camiones camín de Madrid. Los seis primeros cargaron yá nel almacén de sal de Payares.

La prioridá ye recuperar les comunicaciones con Madrid y per Madrid hacia'l restu de la península.

La situación na capital meyoró un poco, pero inda se ta lloñe de la normalidá.

Cientos de camioneros atrapaos pola ivernada en tol país

La ivernada dexó atrapaos a cientos de camioneros en tol país. Lleven dende'l vienres reteníos en polígonos o árees de serviciu. La mayoría ensin tener un llugar onde tomar café o dir al bañu. TPA faló con dellos reteníos en Valencia, Albacete y Getafe.

Tocante a la capital, Madrid estudia pidir la declaración de zona catastrófica pa la capital. La M30 vuele a tener carriles habilitaes, pero pide a la población que nun vaya a quitar los coches abandonaos. Nel centru, circúlase con munchu procuru.

Sánchez llama a la cooperación ente alministraciones énte la ivernada

El presidente del Gobiernu, Pedro Sánchez, que presidió esta mañana la xunta del Comité Estatal de Coordinación y Dirección (Cecod) del sistema nacional de Protección Civil, sorrayó la necesidá de cooperación y coordinación p'actuar cola mayor eficacia nesta situación.

Nuna xunta na sede del Ministeriu del Interior nel Paséu la Castellana de Madrid, a la que llegó nun vehículu touterrén, Sánchez recibió información sobro la situación provocada pola borrasca Filomena, lo mesmo que de les previsiones pa los próximos díes.

Ye la primer xunta de coordinación a la qu'asistió Sánchez de forma presencial desque empezó esti episodiu de fríu y nieve, y na que tuvo acompañáu nel Ministeriu del Interior pol so titular, Fernando Grande-Marlaska, y el ministru de Tresportes, Movilidá y Axenda Urbana, José Luis Ábalos.

Según informó'l Gobiernu nuna nota, dende l'entamu de la ivernada'l xefe del Executivu treslladó a los presidentes autonómicos y responsables municipales de les zones más afectaes que'l principal oxetivu común ye la máxima coordinación ente alministraciones como ferramienta fundamental pa ufiertar una respuesta a los efectos de la borrasca.

El presidente pudo conocer esti domingu l'ameyoramientu apreciable del estáu de les carreteres respecto al sábadu, y tamién foi informáu de que l'aeropuertu de Madrid Barajas Adolfo Suárez caltién suspendíes les sos operaciones, y tamién tán suspendíos tolos trenes con orixe y destín en Madrid.

Tanto l'aeropuertu madrilanu como Renfe y ADIF van evaluar a lo llargo del día'l posible entamu de los sos respectivos servicios de manera gradual, siempres dependiendo de la situación de la infraestructura.

El Cecod ye'l muérganu directivu central dientro del nuevu Plan Xeneral d'Emerxencies del Estáu (Plexem), aprobáu'l pasáu 15 d'avientu pa optimizar les respuestes de les alministraciones énte emerxencies de Protección Civil.

Nesti Plan, y énte la situación y previsiones meteorolóxiques, declaróse'l pasáu xueves la fase de preemerxencia en situación operativa 1 por parte del Ministeriu del Interior.

Los ministros d'Interior, de Tresportes, Movilidá y Axenda Urbana, tuvieron acompañaos nel Cecod polos sos equipos al traviés de videoconferencia, ente los que tán los responsables de Protección Civil, DXT, Guardia Civil de Tráficu, Seguridá Ciudadana, Infraestructures, Carreteres, ADIF, AENA, Política de la Defensa, UME, Aemet y DSN.