Asturies defende la multillateralidá y solidaridá ente territorios

Llamedo defende una financiación que tenga en cuenta'l costu real de los servicios

El Gobiernu d’Asturies aseguro esti miércoles que la so posición al respective de la financiación autonómica ye "clara, coherente y sofitada n’argumentos" y básase na defensa de la "multillateralidá" y "solidaridá" ente los territorios como principios "fundamentales".

Asina lo señaló la vicepresidenta y presidenta en funciones del Principáu, Gimena Llamedo, en declaraciones a los periodistes al entruga-y pol alcuerdu algamáu ente’l PSC y ERC pa la investidura de Salvador Illa.

Llamedo recalcó que la posición del Principáu en cuantes a financiación autonómica afítase nel alcuerdu robláu con tolos grupos parllamentarios, menos Vox, y na 'Declaración de Santiago', roblada con otres siete comunidaes a finales de 2021.

Solliñó que la postura del Principáu básase nun "principiu irrenunciable, como ye la multillatelaridá" y nuna financiación que tenga en cuenta’l costu real de los servicios, con una mayor ponderación de factores como la orografía o l’avieyamientu de la población.

El Principáu siempres refugó alcuerdos billaterales en materia de financiación

El Principáu siempres refugó, hasta agora, alcuerdos billaterales en materia de financiación autonómica.

Cuando’l gobiernu catalán, d’ERC, propunxo en marzu d’esti añu, dos meses enantes de los comicios, un modelu de financiación específicu pa Cataluña y la recaldación del 100% de los impuestos, la rempuesta del presidente del Principáu, Adrián Barbón, foi rotunda, amosando’l so refugu frontal a esa midida.

Na mesma llinia manifestábase un mes dempués, en TPA Noticies Matinal, el voceru del executivu, Guillermo Peláez.

Guillermo Peláez sí defendía un mes dempués, en comisión parllamentaria, la propuesta de Salvador Illa de crear un consorciu tributariu al considerar que pue tener efectos beneficiosos.

Peláez señalaba que toles comunidaes podríen crear esos consorcios cola Axencia Tributaria, pa xestionar los sos tributos.