Aumenten les poblaciones de carboneru y avión n'Avilés y baxa la d'andarina según el so últimu censu

El carboneru ye'l primeru n'emigrar y antemana'l final del branu

Aumenten a 800 la población de carboneros y a 186 la d'aviones n'Avilés. Baxa a 93 exemplares la población d'andarina na ciudá. Datos qu'amuesa l'últimu censu ellaboráu pol grupu ornitolóxicu Mavea.

El recuentu dexa afitar el grau d'amenaza, establecer l'estáu de caltenimientu d'estes especies y ver la evolución de la so población.

L'últimu censu ficiérase fai más de 10 años.

El carboneru ye'l primeru n'emigrar y antemana'l final del branu. Los postreros exemplares tán dexando estos díes pueblos y ciudaes d'Asturies camín del sur del Sahel y países del centru d'África, onde van tar hasta la llegada de la primavera.

Pa munchos ye l'ave perfecta y cada vez son más los sos siguidores.

Nel aire puen tar hasta 10 meses siguíos. Y ye que si cayera'l suelu nun sabría remontar el vuelu.

El so gran picu, que lleva abiertu mientres vuela, ye un insectívoru voraz. El so hábitat suel ser el pueblu o la ciudá onde atopa abellugu en pequeños resquiebros d'edificios. A la perda de buecos pa la cría suma l'amenorgamientu d'alimentos, por cuenta de que les poblaciones d'insectos amenorguen pol usu xeneralizáu de pesticida.​