Avilés pide "máxima responsabilidá y cuidáu estremu"

L'Ayuntamientu refuerza'l control d'aforos en parques, colexos y mercaos

L'alcaldesa d'Avilés, Mariví Monteserín, fizo un llamáu a la “máxima responsabilidá y cuidáu estremu” dempués de la decisión del Principáu de declarar l'alerta naranxa nel conceyu pola pandemia.

En declaraciones a los periodistes, Monteserín recordó que la declaración d'alerta naranxa ye un llamáu d'atención pa evitar midíes más restrictives y una oportunidá pa controlar los contaxos.

Esta declaración nun implica midíes restrictives nueves, pero sí un estrictu siguimientu de les vixentes anguaño pola Policía Local pa reforzar la responsabilidá individual.

Asina, l'Ayuntamientu reforzará'l control d'aforos nes zones de xuegos infantiles de los parques, el mercáu de los llunes y los colexos, esplicó.

Dalgunos vecinos d'Avilés consideren que tamos relaxándonos.

Mientres, los vendedores ambulantes vuelven a l'actividá na fastera del Nalón nesta xornada. A pesar de qu'en Samartín del Rei Aurelio l'alerta naranxa dura hasta'l vienres, esta situación nun lleva restricciones municipales.

En Llangréu güei celebróse'l mercáu de La Felguera y en Llaviana los comerciantes podrán colocar mañana los sos puestos otra vuelta. En L’Entregu, güei celebróse'l mercáu de los miércoles.