Barbón afita que nun hai que perder la esperanza y "siguir lluchando"

Lleguen "selmanes mui dures" y la batalla escontra'l coronavirus "necesita de toos"

El presidente del Principáu, Adrián Barbón, aseguró esti sábadu que, de nun tomase decisiones "tayantes" n'Asturies enantes de la declaración del estáu d'alarma, el númberu de contaxos na rexón, que provocaron yá siete muertes y cuasi 500 positivos, sedría entá mayor.

Nun mensaxe institucional al cumplise una selmana del confinamientu decretáu pol Gobiernu central, Barbón alvirtió que lleguen "selmanes mui dures" y que la batalla escontra'l coronavirus "necesita de toos" y afitó que nun hai que perder la esperanza y "siguir lluchando" pa que, cuando se gane, los ciudadanos puean volver sentir de nuevo "el significáu de la llibertá".

El xefe del Executivu recordó que, desque'l pasáu 29 de febreru se detectó'l primer casu positivu n'Asturies, el Principáu foi tomando decisiones como la prohibición de facer visites n'hospitales o en residencies de vieyos o'l zarru de colexos y tiendes, que s'aplicó enantes que nel restu d'España.