Bisuyu, el pueblu d'Alejandro Casona

En castellano: Besullo, el pueblo de Alejandro Casona

Cúmplense 120 años de la nacencia del dramaturgu

Parada obligatoria, namás entrar en Bisuyu, el centru de recepción de visitantes d'Alejandro Casona, que rinde tributu al so vecín más pernomáu. Una planta dedicada a la vida y obra del dramaturgu. La so infancia nel pueblu y el so periplu per distintos llugares acompañando a sos padres, maestros dambos, nos sos destinos, hasta la so graduación en Maxisteriu en Madrid y los sos entamos como autor y la so participación nes misiones pedagóxiques que traxo a Bisuyu. Julio Rozas ye'l responsable del Centru de Recepción de Visitante Alejandro Casona de Bisuyu.

La esposición sigue cola so vida nel esiliu, tres la guerra civil, onde desenvolvió gran parte de la so obra. Una introducción pa les visites guiaes a Bisuyu que se faen dende'l centru, na que l'escritor y los llugares emblemáticos de la so vida y obra son fundamentales.

Na casa natal del dramaturgu, güei propiedá del so sobrín Luis Miguel Rodríguez, la familia caltien tol so legáu. Notes y cartes d'escritores coetaneos de la xeneración del 27, semeyes de conocíos autores o la escopeta cola que diba de caza, amás d'una gran colección de fotografíes familiares. El so sobrín guarda con especial ciñu un cuadernu nel que fueron escribiendo xeneración tres xeneración, nel que tamién Casona dexó la so buelga.

Cuasi cada branu tornaba al so pueblu natal y los requexos y paraxes de Bisuyu tán reflexaos en tola so obra. Dende la Casona, antigua escuela, de la que tomó'l so apellíu lliterariu, hasta l'ambientación íntegra de 'La Dama del Alba'.

Tola obra de Casona ta trescalada del espíritu de Bisuyu. Y la figura del dramaturgu ta siempres presente nes actividaes que se desenvuelven nel pueblu.

Comparte