Bloquiada la reforma estatutaria pa impulsar la oficialidá del asturianu

Foro caltién la so esixencia de que la reforma lleve apareyada una rebaxa fiscal

La reforma estatutaria impulsada pol Gobiernu del Principáu p'amestar, ente otros aspeutos, la cooficialidá del asturianu y del eonaviegu quedó bloquiada güei al caltener Foro la so esixencia de qu'esi procesu lleve apareyada una rebaxa fiscal qu'incluyiría na práctica la supresión del impuestu de sucesiones.

Foro caltuvo esti criteriu na xunta que caltuvo colos grupos parlamentarios de PSOE, Podemos y IX, que sofiten la oficialidá a la que s'oponen PP, Ciudadanos y Vox. Los sos 26 votos son insuficientes pa sacar alantre la reforma nel parlamentu autonómicu onde sedría necesario sumar el sofitu del parllamentariu y secretariu xeneral forista, Adrián Pumares.

"Hai tres fuerces polítiques que sumen 26 escaños y que tán a favor d'un reforma qu'incluya la oficialidá y unu col oxetivu de que se baxen los impuestos", apuntó tres la xunta la vocera socialista, Dolores Carcedo, qu'acusó a Foro d'afitar como "innegociables" les sos esixencies en materia tributaria pese a que nun primer momentu tuvieron abiertos al diálogu sobre elles.