CAC-Asprocon pide más inversión en construcción en 2020 y menos gastu social

El presidente de la patronal alvierte de la perda de trabayos "si nun s’entama llicitar obra yá"

El presidente de la patronal constructora CAC-Asprocon, Joel García, defendió esti miércoles que los presupuestos rexonales pa 2020 dean solución a la inversión "ridícula" n’obra pública d’esti añu pa facer "catenible" al sector y solliñó que la "sanidá, la educación y les polítiques sociales nun puen ser un pozu ensin fondu".

En rueda de prensa, García amosó la so esmolición por cifres d’inversión n’obra pública perteneciente al Principáu que se manexen pal añu qu’entra, cuando en 2019 foi "ridícula", al nun pasar de los 38 millones ente toles conseyeríes, mientres que, a xuiciu de so, debería llegar cerca de los 130 millones, al rodiu del 3% del presupuestu asturianu.

Pal presidente de la patronal, "nun ye posible una construcción caltenible col nivel d’inversión n’obra pública de los últimos exercicios" y apuntó que 130 millones d’euros d’inversión nel sector sedría "lo mínimo pa caltener les infraestructures n’orde".

"Los presupuestos nun tienen que ser continuistes, hai qu’apostar por midíes más valientes y el caltenimientu de les infraestructures qu’hai n’Asturies ensin recurrir a les cantidaes que van sobrando o remanentes ", pidió García al Gobiernu asturianu.

El presidente de la patronal de la construcción alvirtió que "si nun s’entama a llicitar obra yá, en pocos meses tarán en peligru cientos de trabayos nel sector" y reclamó que "se ponga en marcha la maquinaria de llicitación, porque tarden ocho meses de media n’axudicar una obra".