Cadasa invertirá, hasta 2030, 60 millones pa llevar l'agua dende'l centru hasta l'oriente d'Asturies

El consorciu tien en marcha un plan de dixitalización pa la zona d'Avilés

Cadasa invertirá, hasta 2030, 60 millones d’euros pa llevar l’agua dende’l centru hasta l’oriente d’Asturies. Tamién tien en marcha un plan de dixitalización pa la zona d’Avilés que cunta con una ayuda europea de 6,5 millones d’euros.

El plan director d’abastecimientu d’agua supera los 240 millones d’euros, inxerta l’anovación de redes pero tamién ampliala y llevar l’agua del centru d’Asturies hasta l’oriente. L’agua nun ye un problema agora pero podría llegar a selo en conceyos como Llanes, por exemplu, de manera puntual.

Nuna entrevista en TPA Noticies Matinal, Manuel Gutiérrez, xerente de Cadasa, esplicó qu’esa conexón podría tar rematada en 2030. Lo que s’aborda tamién ye la dixitalización, pa rastrexar l’agua, saber de cuánto se dispón en cada momentu y poder anticipase.

Esi proyectu de dixitalización ye, en total de 10 millones d’euros. Sobre Llangréu, Cadasa lo que nun quier ye tener la obligación llegal de soltar más agua de L’Embalse de Rusecu de lo necesario porque, amiesta, Llangréu consume namás un cuartu del agua que tien concedío.