Camblor nun descarta'l Centru Cívicu pa xunir les sedes xudiciales n'Uviéu

El Principáu espera un informe de la Universidá pa saber "si ye aceptable" xunir les sedes en Llamaquique

La conseyera de Presidencia, Rita Camblor, afirmó esti martes que’l grupu de trabayu que fai un informe sobre la xunión de les sedes xudiciales d’Uviéu ve la zona de Llamaquique como un llugar afayadizu, en concreto la Facultá de Ciencies, anque la titular de Xusticia nun descartó’l Centru Cívicu, xunto al actual Palaciu de Xusticia, como otra de les posibles soluciones p’acabar col espardimientu y falta d'espaciu nestos llugares.

Na so comparecencia énte la comisión de Presidencia de la Xunta Xeneral pa informar sobre la situación de la xusticia nel Principáu, Camblor dixo que tán esperando l’informe del rector de la Universidá d’Uviéu, Ignacio Villaverde, sobre la situación d’esti campus pa saber "si ye aceptable" xuntar les sedes en Llamaquique.

"Ye una situación complicada, de mano, pol altu costu que pue llevar y, dempués, porque l’asitiamientu guste a toos y dexe axuntar toles sedes d’Uviéu", solliñó la conseyera, que llamentó que nun se tenga en cuenta los adelantos algamaos nos últimos años na meyora y modernización de l’alministración de la Xusticia n’Uviéu.