Camblor pide propuestes 'reales' pa la unificación de les sedes xudiciales

El Colexu d'Arquiteutos va facer un estudiu de la situación de toles sedes del Principáu

La conseyera de Presidencia, Rita Camblor, pidió a los axentes implicaos na unificación de les sedes xudiciales d'Uviéu que faigan propuestes "reales" ante l'actual problema de dispersión, yá que la so solución viose retrasada pola pandemia.

"Ye hora de ponenos a actuar", dixo tres participar nuna xunta p'abordar esta cuestión, que cuntó col presidente del Tribunal Cimeru de Xusticia d'Asturies, Jesús María Chamorro, la fiscal cimera d'Asturies, Esther Fernández, y representantes del Conceyu d'Uviéu, la Universidá y el Colexu d'Arquiteutos de la capital, ente otros.

Según esplicó Camblor, l'oxetivu ye tratar de buscar una solución "afayadiza" a la dispersión de les sedes d'Uviéu, qu'afecta a 46 muérganos xudiciales y a otros servicios como la Secretaría de Gobiernu, el Xulgáu Decanu, el Xulgáu de Guardia, el Rexistru Civil, los equipos psicosociales y la Oficina d'Asistencia a les Víctimes.

La conseyera, qu'esplicó que se va estudiar la viabilidá de les distintes propuestes que salgan d'estos alcuentros, recordó que'l Colexu d'Arquiteutos va facer un estudiu de la situación de toles sedes xudiciales del Principáu, con enfotu cimeru nes de la capital.