Cangas acueye'l XII Alcuentru de Pueblos Exemplares

Una xornada que cavilga sobre la importancia de les asociaciones nel mundu rural

Les asociaciones tienen una importancia capital nos pueblos porque fomenten les relaciones ente los vecinos, cohesionen el territoriu y sirven d'elementu dinamizador. Esta ye una de les idees que se defendieron nel XII Alcuentru de Pueblos Exemplares y qu'encarna Mual, el llugar cangués que se convirtió n'exemplar en 2018 pol so movimientu asociativu, agora convertíu en cooperativa y con infinidá de proyectos per delantre.

Un movimientu asociativu que tamién fomenta la cultura, caltién les tradiciones y dexa, al visitante, conocer esi territoriu.

Tamién se defendió que los pueblos nun puen ser namá l'abellugu de los turistes. Pa la so supervivencia necesiten proyectos granibles que desenvuelvan los vecinos. D'ehí que quixeren amosar a aquellos que viven y trabayen nel pueblu.

Unos proyectos que salieron alantre, en bona parte, gracies a la comunidá y a les sinerxes de los sos propios pueblos.