Cuasi un millar d'asturianos n'ERTE entá nun cobró

El Gobiernu pide a los axentes sociales que negocien l'ampliación de los espedientes enantes del martes

Tres meses ensin cobrar nada xunto a otros 13 compañeros n'ERTE. Esperen que se-yos ingrese en xunetu, pero dalgunos yá s'incorporaron al so puestu na empresa que da serviciu a la hostelería, y nun son los únicos regulaos ensin nómina.

Según una encuesta ellaborada pol Conseyu Xeneral de Colexos de Xestores Alministrativos a nivel nacional, a fecha 1 de xunu, cuasi un millar d'asturianos incluyíos nun ERTE nun recibiera nada.

La principal causa de los retrasos ye'l gran volume d'espedientes que se tuvieron que tramitar, con cifres qu'algamen les de los peores años de la crisis.

Les situaciones personales de los afectaos complíquense entá más pola falta d'información.

Los xestores apunten la necesidá d'ampliar los plazos de los ERTE de fuerza mayor al máximu, pa dar oxíxenu a les empreses.

La prueba de fueu sobro la so supervivencia va llegar na seronda y, por eso, piden que la protección llegue más allá del estáu d'alarma.

El Gobiernu pide a los axentes sociales que negocien l'ampliación de los ERTE enantes del martes

El 30 de xunu acaba la vixencia de les condiciones especiales d'esos ERTE de fuerza mayor.

El Gobiernu pide a sindicatos y patronal qu'algamen un alcuerdu p'allargalos hasta setiembre, enantes del próximu martes. Na CEOE quieren que se llegue hasta fin d'añu.

Los sindicatos tán más dispuestos a aceptar l'allargamientu hasta final del branu, anque consideren que tendríen que siguir mientres perduren les consecuencies de la pandemia.

El serviciu públicu d'empléu reabre mañana al públicu les sos oficines n'Asturies y el restu de territorios en Fase 3.