Entama la evaluación final na Universidá d'Uviéu con 259 esames non presenciales

Ente'l 13 de mayu y el 6 de xunu piensen facer 2.941 esames online

La Universidá d'Uviéu entama'l periodu d'evaluación final del segundu semestre con 259 esames non presenciales programaos pa 6.689 estudiantes. Según informó la institución académica nun comunicá, en conxuntu, ente'l 13 de mayu y el 6 de xunu, piensen facer 2.941 esames online.

Pa garantizar la evaluación non presencial, la Universidáha reforzó'l so campus virtual con más nodos y la merca de nuevu hardware. Al empar, desplegó un nuevu campus virtual na ñube destináu, dafechu, a la fechura d'esames. Nesti nuevu serviciu tán programaes pa güei 58 pruebes a les que tán llamaes y llamaos 2.459 estudiantes.

La Universidá caltién una estrencha collaboración cola Federación Asturiana de Conceyos (FAC) pa facilitar la entrada segura a instalaciones municipales pa la fechura d'esames online.