Entamen los trabayos pa camudar dafechu la rotonda de la Cruz Roja n'Uviéu

Los cortes de carretera y esvíos na zona entamarán dempués de la navidá

Entamen los trabayos pa remocicar dafechu la entrada d’Uviéu pela autopista 'Y', el Bulevar de Santuyano. Los operarios tán faciendo calicates, ye dicir, sondeos y análisis del tarrén enantes.

Tresfórmase dafechu la rotonda. Moveráse y daráse-y una forma que l’Ayuntamientu denoma "amorfa", con imaxe de "faba" o de "reñón", al ser allargada. Dende la entrada d’Uviéu per Santuyano veráse estirada hacia’l Bulevar d’El Vasco. Podrá caminase per dientro d’ella. Habrá pasos de peatones, siendes ciclistes, una fonte y un mirador.

La obra durará ocho meses. Habrá cortes de tráficu y esvíos provisionales qu’entamarán dempués de la navidá. Munchos d’ellos sedrán nocherniegos.

Ente los cambeos, tamién habrá una zona verde nel Bulevar de Santuyano xusto nel llateral de la fábrica de La Vega. El presupuestu ye de 5.400.000 euros. Cunta con ayuda de los fondos europeos y sedrá’l primer pasu pa tresformar la zona.