Cuntaos 13 llobos muertos, nel últimu añu y mediu

Los más d'ellos apaecieron colgaos

Unos 13 exemplares de llobu apaecieron muertos en circunstancies estrañes n'Asturies nel últimu añu y mediu. La Fiscalía ta investigando toos estos casos nel marcu de las dilixencies abiertes pola denuncia d'Adena, que sollertaba de la muerte de polo menos seis exemplares.

Según pudo saber TPA, los informes remitíos al Ministeriu Públicu pola Guardia Civil reflexen que munchos de los exemplares presentaben furacos compatibles con disparos de bala.

Per conceyos, l'oriente asturianu, y en concreto Cangues, encabeza la llista d'exemplares finaos nel últimu añu y mediu. Xunto con Amieva y Parres, son siete los llobos apaecíos nesta fastera.
Nel occidente, son seis en total nos conceyos de Tinéu, Allande, Salas, L.lena y Teberga.

En Cangues, dos cabeces de llobu apaecieron colgaes de la ponte romana nel mes de xunu del añu pasáu. Otru llobu apaecía en payares decapitáu, y con mancadures de bala, dientro d'un coche de la conseyería.

En febreru d'esti añu, otru exemplar foi atopáu atáu al tubu d'escape d'un coche. Tamién presentaba signos de disparos.

Como los atopaos va namái dos meses nel aparcamientu públicu de Les Arriondes. Teníen furacos de bala y fueren ataos a la bola del remolque d'un toutarrén.

Colgáu d'un poste de teléfonu apaeció otru exemplar n'Amieva, como en Salas, onde amás unu de los exemplares presentaba mancadures de bala.

Tamién apaecieron colgaos d'una señal dos exemplares en L.lena y Teberga. Mientres qu'en Tinéu y Allande, atopáronse dos llobos atropellaos.

Nel so informe, la benemérita apunta que les investigaciones feches hasta agora nun pudieron determinar quién ta tres estes muertes.