Cortada la ponte de Quinzanas, en Pravia

Al otru llau de la ponte viven cuasi 100 persones en Quinzanas y Pronga

La ponte de Quinzanas, nel conceyu de Pravia, sigue cortada al tráficu. Esti zarru sorprendió a los vecinos del llugar, yá qu'anque lleven tiempu esperando a que la reparen, nun creíen que'l corte fuera darréu y ensin previu avisu.

Al otru llau de la ponte viven cuasi 100 persones repartíes ente Quinzanas y Pronga. Pa ellos, foi un contratiempu, al igual qu'una sorpresa, que'l pasáu miércoles cortaren la so principal vía de comunicación per carretera con Pravia.

Agora, yá nun tán a cinco kilómetros de la villa, sinón a 15, convirtiéndose nel pueblu más alloñáu de la capital del conceyu.

Dende'l Conceyu de Pravia pidieron al Principáu qu'esplique'l porqué del corte de la ponte. Esiste una partida de 326.000 euros pa reparar la ponte y quieren saber cuándo van entamar les obres, y el so plazu d'execución. ​