Medra l'emprendimientu femenín n'Asturies

Asturgar facilitó avales pa creitos a más empresaries autónomes qu'homes

Aumenta'l númberu de muyeres que lideren proyectos empresariales sofitaos por Asturgar. Anguaño les muyeres son mayoría ente los entamadores autónomos, según datos de la Sociedá de Garantía Recíproca Asturgar. TPA Noticies tuvo con tres autónomes empresaries.

Conserves Hazas nació va dos años. Centrada n'anchoes gourmet emplegando a muyeres de Llastres foi la fórmula d'Ana pa volver de Madrid. Llegaron a vender les sos anchoes hasta Xapón pero nada ye fácil y ye que conciliar siendo autónoma, ye entá más complicao.

Pa Carolina Díaz entamar foi una revolución na so vida. De Química con trabayu de consultora, pasó a la educación, fundando KidsBrain Uviéu. Tien proyectos en tres colexos y un centru, y piensa en siguir creciendo.

Muyeres, como estes, son mayoría ente los autónomos n'Asturies. Asturgar facilitó avales pa creitos a más empresaries autónomes qu'homes na mesma situación: elles son el 56%.

Puestos a montar un negociu'l principal mieu ye'l financiamientu, como socedió a Marta Sampedro Iglesias, una xuguetera qu'acaba d'abrir la so propia tienda en Siero.

Según Asturgar les cifres d'emprendimientu femenín tán al alza. Ensin tener en cuenta'l réxime llaboral, les muyeres supunxeron el 37% de los empresarios que recurrieron a la sociedá, 11 puntos más que va dos años.