Medra la demanda del programa de 'mentoring' de l'Asociación Compromisu Asturies XXI

Conecta a estudiantes d'últimu añu d'universidá con profesionales de más de 20 años d'esperiencia

Dende esti mes de xunetu, l’Asociación Compromisu Asturies XXI cunta con un espaciu dixital qu’axunta los perfiles, los currículos de los 63 mozos qu’esti añu participaron na decimotercera edición del Programa Mentoring.

Una iniciativa cada vegada más demandada qu’allana’l pasu de los universitarios d’últimu cursu al mercáu llaboral. Failo con sesiones colos mentores, toos ellos socios y con destacaes trayectories profesionales.

El programa conecta a estudiantes d’últimu añu d’universidá colos mentores, con profesionales de más de 20 años d’esperiencia, con socios de Compromisu Asturies XXI, referentes nel so sector y que, los más, trabayen nel estranxeru.

Mentores qu’allanen asina’l pasu al mercáu llaboral facilitando, por exemplu, contactos y la búsqueda de práctiques.

De los 11 participantes nel primer programa pasóse a los 63 d’esti decimotercer añu. Los más vienen de les árees del Derechu, la Economía y les inxenieríes, anque cada vegada s’inxerten más d’humanidaes. Los sos perfiles recoyeránse nel espaciu dixital que dende xunetu tará disponible como novedá na asociación.

El programa desendólcase cada añu ente febreru y xunu y con un mínimu de tres sesiones. Ye l’asociación la que selecciona a los mozos qu’enantes puen amosar les sos preferencies polos mentores. El so númberu medra tamién y algamará’l centenar.

Baudilio Alonso y Esmhara Álvarez conócense en persona delantre de les nuestres cámares. Hasta agora, desendolcaron el Programa Mentoring de forma telemática.

Él ye director comercial d’una inxeniería asturiana. Ella estudia l’últimu añu d’Alministración y Dirección d’Empresa.

Baudilio participó en programes de Compromisu Asturies XXI va 10 años. Esti añu, estrénase como mentor.

Aleida González y Benjamín Gutiérrez tamién vienen del mundu de la empresa, nel so casu con un interés común pola loxística y les compres.

Benjamín decidió ser mentor, dempués d’una etapa nel extranxeru, na qu’él recibió l’ayuda d’un mentor.

La cita viniente tiénenla’l vienres 9, na entrega de diplomes del programa.