Medra la demanda nos colexos mayores, pendientes de concretar l’aforu máximu

Seis de los siete asturianos con un 10 na EBAU matriculáronse na Universidá d’Uviéu

Utilizar o non les habitaciones dobles. A daqué más d’un mes del entamu del cursu, nun ta decidío’l tipu d’agospiu nos colexos mayores de la Universidá. Rexistróse un llixera medría nes solicitúes pa los tres centros y tán faciéndose midíes anticovid.

Llixera medría nes solicitúes pa los colexos mayores de la Universidá d’Uviéu. Enagora la idea ye que los tres centros, dos n’Uviéu y unu en Mieres, abran con normalidá.

La empresa concesionaria ta faciendo un protocolu de midíes preventives frente al COVID-19. Hai llista d’espera y les places axudíquense por nota.

Duldes sobre l’usu d’habitaciones dobles por mor de la demanda nun protocolu entá por matizar. Los dos colexos mayores n’Uviéu y la residencia d’estudiantes en Mieres cuenten en total con 284 places.

Si una habitación doble pasa a ser cenciella, el preciu tamién camudaría. Menos esti cambéu, nun se va producir nengún cambéu nes tarifes yá asoleyaes.

La vida nos colexos mayores sedrá distinta dende setiembre con munches midíes a afitase nes zones comunes. Turnos nel comedor, puntos d’entrada y salida pa evitar aglomeraciones, y aforu llendáu y cita previa pa usu de biblioteques y sales d’estudiu.

Dempués d’acoyer a pacientes de COVID nel momentu altu de la pandemia, la residencia de Mieres ufiértase otra vuelta a los alumnos de la Universidá y cuenta con más solicitúes que n’años anteriores. Los colexos San Gregorio y América tarán completos y tienen yá llista d’espera.

Seis de los siete asturianos con un 10 na EBAU matriculáronse na Universidá d’Uviéu

De los siete estudiantes asturianos que sacaron un 10 na EBAU, seis matriculáronse na Universidá d’Uviéu.

En total, 11.500 estudiantes, 4.000 más que l’añu pasáu, preinscribiéronse na Universidá asturiana, anque s’espera un númberu asemeyáu d’alumnos al del cursu pasáu.

La Universidá evalúa agora’l grau de presencialidá pa caún de los Graos y l’aforu de cada aula, teniendo en cuenta que la mazcarina sedrá obligatoria y caltendráse una distancia d’un metru ente alumnos.​