Cuidadores de menores con grandes discapacidaes piden equiparación coles profesionales

La próxima selmana xuntaránse cola conseyera de Derechos Sociales y Bienestar

Dende hai once años Eva Brandi nun tiene un respiru. Madre de dos fíos, unu d'ellos con múltiples discapacidaes incluyíos trestornos conductuales, ye l'arquetipu de les cuidadores principales de menores con gran dependencia.

Les circunstancies llévales a vivir pa cuidar, lloñe del mercáu llaboral y de la vida social. La mayor parte de les veces acaben asumiendo la crianza en solitario.

Ensin titulación, tienen un máster vital en cuidaos integrales de los sos fíos y fíes como ye'l casu d'Olaya Sevilla. La so primoxénita ta diagnosticada d'una enfermedá tan poco frecuente que ye 'ultrarrara'. Sólo hai 13 casos n'España. A los 10 años, Nora yá tien reconocíu un 82% de discapacidá.

Esta maternidá ye cotidiana pa más de 150 families asturianes. N'ocasiones por partida doble. Estes madres quieren que la próxima modificación de la Llei de la Dependencia reconóza-yos los derechos llaborales de les cuidadores profesionales, el salariu mínimu interprofesional y que nun tengan, por exemplu, qu'escoyer ente prestaciones

La so realidá visibilizaránla la próxima selmana na Conseyería de Derechos Sociales y Bienestar.