David Álvarez considera un maquillaxe les midíes de restricción de pesca del salmón propuestes pol Principáu

El profesor de Zooloxía de la Universidá d'Uviéu pide la veda total y señala que les repoblaciones nun sirven

El profesor de Zooloxía de la Universidá d’Uviéu, David Álvarez, considera un maquillaxe les midíes de restricción de pesca del salmón propuestes pol Principáu. Pide la veda total pa recuperar una especie que considera en peligru de desaniciu y señala que les repoblaciones nun sirven.

David Álvarez indica que va 40 años pescábanse 10.000 salmones nos ríos asturianos y agora son malapenes 400 nun añu. Pide que s’escuche a la ciencia y que se tomen midíes valientes.

Señala que les repoblaciones de los ríos nun funcionen, malapenes hai retornu de los alevines lliberaos. En Gales prohibiéronse atendiendo a estudios científicos.

Na última xunta del Conseyu Rexonal de Pesca’l Principáu plantegó amenorgar el cupu por pescador de tres a dos salmones y baxar la presión de la pesca en zones concretes.