Declaración institucional pa que Defensa faga lo posible p’axudicar el contratu del 8x8 a Santa Bárbara

Los diputaos asturianos consideren que la perda de los blindaos supondríen un perxuiciu pa una industria estratéxica

El Parllamentu asturianu acordó esti miércoles una declaración institucional na que pide al Gobiernu central que nel marcu llegal esistente "faga lo posible" pa que la empresa Santa Bárbara seya la encargada de la fabricación de los vehículos blindaos 8x8 na Fábrica d’Armes de Trubia.

El testu, acordáu cola unanimidá de tolos partíos, reclama al Executivu central que supere les "diferencies d’anguaño" pa la so axudicación a Santa Bárbara.

Defensa axudicare a Santa Bárbara de forma directa esti contratu pa facer 348 vehículos de combate 8x8, por un importe de 2.100 millones d’euros.

Sicasí, el Ministeriu decidió’l mes d’avientu pasáu declarar el contratu desiertu énte l’incumplimientu de requisitos técnicos y económicos, poro, abriráse darréu una llicitación pública.

La declaración institucional destaca la importancia que tien pal Principáu’l caltenimientu de l’actividá na planta y el so nivel competitivu, asina como la medría del trabayu col nuevu contratu.

El testu acordáu solliña’l raigañu que la fábrica tien n’Asturies, la esperiencia de los sos trabayadores y la necesidá d’evitar deslocalizaciones empresariales.

"La perda d’esti contratu, si ye’l casu, supondría una torga amestada na posición competitiva internacional de la empresa", diz el testu, que tamién recueye que supondría un "perxuiciu" p’Asturies.