Denunciáu por provocar un accidente nel Rally Princesa d'Asturies con material esnidioso

Unu de los coches salió de la carretera, anque conductor y copilotu resultaron ilesos

La Guardia Civil denunció énte'l xulgáu a un mozu de 26 años por provocar l'accidente d'unu de los coches participantes nel Rally Princesa d'Asturies celebráu'l pasáu mes de setiembre, al esparder na carretera material esnidioso.

El mozu foi denunciáu tres l'análisis d'un videu grabáu por un aficionáu, nel que se-y pue ver espardiendo'l material esnidioso a la entrada d'una curva de l'AS-334 (carretera de Torazu), col enfotu de provocar el derrapaxe y perda de control de los coches participantes, informó esti xueves la Comandancia d'Uviéu.

Por cuenta de ello, sobre les 14:00 del sábadu 14 de setiembre, salió de la carretera unu de los vehículos participantes, un Renault 5 GT Turbo. Los sos ocupantes -conductor y copilotu- resultaron ilesos.

El coche sufrió importantes desperfectos que torgaron que siguiera la carrera.

L'atestáu instruyíu pola Guardia Civil foi unviáu al Xulgáu d'Instrucción Únicu de Piloña.