Prindada otra vuelta una cabecilla de la 'Banda del Seat León' por otru robu en Xixón

La Policía Nacional yá prindó a 10 persones venceyaes con esta facción

La Guardia Civil prindó otra vuelta a una de les cabecilles de la 'Banda del Seat León' por robar la madrugada del llunes pasáu nun restaurán de la zona rural de Xixón.

El propietariu del restaurán, que tien la vivienda nel pisu d’arriba del establecimientu, dio avisu a la Guardia Civil al rodiu de les 2:00 dempués de sentir ruíos dientro.

Los axentes llegaron cuando los autores del robu fuxíen nun coche Nissan Micra, al que trataron ensin éxitu algamalu por mor de l’alta velocidá y les maniobres temeraries feches pol conductor, según informó esti vienres la Comandancia de Xixón.

El vehículu de los asaltantes, que chocó escontra’l portón del aparcamientu del establecimientu nel momentu de fuxir, llevaba les lluces apagaes y les matrícules tapaes.

Sicasí, los investigadores pudieron dos díes dempués dar col vehículu utilizáu nel robu y comprobaron que tenía un impactu que correspondía col choque escontra’l portón, y qu’amás fuere utilizáu otres vegaes por una de les cabecilles de la "banda del Seat León".

Les investigaciones llevaron a la detención de T.J.H., de 38 años y vecina d’Avilés, que ya fuere prindada a entamos de xineru pola so presunta participación en tres robos con violencia y intimidación na parroquia de Villabona a un taxista de Xixón, nun establecimientu públicu de Les Vegues, y n’otru del conceyu de Gozón.