Mengua la presencia de velutines

Mediu Rural crea l'aplicación AvisAp y anueva la so web

La campaña d'entrampiu de la velutina acaba con más de 100.000 reines garraes. Son 20.000 exemplares menos que l'añu pasáu. El Principáu destaca que les trampes, 6.600 esta primavera, son cada vez más selectives y aseguren el nivel d'intensidá nes captures.

Un total de 102.526 exemplares de reines garraes nes más de 6.600 trampes distribuyíes per toa Asturies. Son 20.000 exemplares menos que na campaña anterior.

L'ésitu débese, señalen dende la Dirección Xeneral del Mediu Rural, a que les trampes cada vez son más selectives y polo tanto respeten más al restu d'especies. Piden prudencia, sicasí, a la hora de pensar qu'anguaño hai menos velutina.

Nesa llucha escontra l'avispón asiáticu ye fundamental la collaboración ciudadana. Pa meyorala la Conseyería de Mediu Rural punxo en marcha una nueva aplicación AvisAp. Muncho más intuitiva que l'anterior, con cencielles localizaciones y una meyor estructuración, navegar per ella ye muncho más cenciello.

Nun va ser necesario rexistrase p'avisar de la esistencia d'un nial, basta con xubir la fotografía y xeolocalizala nel mapa de l'aplicación. Sí pa dar d'alta los niales.

Dende la Conseyería afiten la importancia de que tolos conceyos s'impliquen na llucha y control de la velutina.