Dolce migrantes non acompañaos residentes n'Asturies quedaron nuna situación irregular tres cumplir 18 años

Nun axunten les condiciones del reglamentu d'extranxería, unos ingresos de cuasi 2.500 euros mensuales

Dolce migrantes non acompañaos residentes n'Asturies quedaron anguaño nuna situación irregular tres cumplir 18 años y nun axuntar les condiciones que-yos esixe'l reglamentu d'extranxería. Píden-yos unos ingresos de cuasi 2.500 euros al mes como requisitu previu pa llograr los permisos de trabayu y residencia. Daqué cuasi imposible pa ellos y pa cualesquier mozu.

Va dos selmanes, el Conseyu de Ministros aprobó'l Real Decretu que modifica'l reglamentu d'estranxería pa facilitar el llogru de los permisos de residencia y trabayu. Una midida que podría beneficiar a los 93 menores estranxeros y mozos ex-tutelaos que viven n'Asturies. Asociaciones como Asturies Acueye celebren la so aprobación, anque piden procuru a la espera de que la reforma entre a valir.

Hasta agora, cumplir 18 años y convertise en mozu ex-tuteláu suponía entrar nun caleyón ensin salida. Pa poder caltenese en situación regular, esixíase-yos un permisu de residencia que solo podíen llograr acreitando unos ingresos, y non pocos, 2.500 euros mensuales.

Cola reforma, esta esixencia económica baxa hasta los 490 euros, anque nun desapaez.

No que llevamos d'añu, 12 menores migrantes non acompañaos quedaron nel llimbu llegal n'Asturies por nun tener permisu de residencia cuando cumplieron los 18, en munchos casos por cuenta de les torgues y los plazos burocráticos.

Una situacion d'irregularidá col consiguiente riesgu d'esclusión y d'espulsión.

Agora, la reforma del reglamentu va dexalos trabayar dende los 16 años.

N'Asturies, hai 32 menores migrantes non acompañaos y 61 mozos ex-tutelaos.