Dos proyectos d'asturianes, escoyíos nun programa européu d'empoderamientu femenín

Kiwin y Panduru quieren poner en valir el campu y los productos de la rexón

Dos proyectos de muyeres emprendedores asturianes opten a un programa européu d'empoderamientu de la muyer na industria agroalimentaria.

Fueron escoyíes d'ente 60 iniciatives españoles y podríen recibir, de llegar al final del procesu, seis meses de formación personalizada y hasta 10.000 euros pa siguir col so proyectu empresarial. Un impulsu que, dicen, pondría en valir el campu y los productos asturianos.

Cristina Secades ye la fundadora de Kiwin, un proyectu que quier poner en valir el trabayu de la muyer y apurrir diversidá a los cultivos asturianos, al empar que da a conocer el mini-kiwi y los sos beneficios.

Pequeñu y ensin pelo na piel, esta fruta tien un sabor que recuerda al de les uves. Entama a nacer en febreru y recuéyese al final del branu. Pa la so producción ye importante protexelu de les xelaes.

Les creadores de Panduru decidieron nuna videollamada nel confinamientu crear esti proyectu. El resultáu, facer repostería con pan duro, destacando los valores tradicionales d'aprovechamientu.

Una idea que ta en fase de creación, pero que quier desarrollar un productu de calidá. Dende madalenes, bizcochos y galletes, a la reformulación de les recetes tradicionales asturianes con ingredientes de proximidá.