Dos proyectos de la Universidá d'Uviéu ganadores de les primes que da l'Idepa xunto con Windar Technology

Valorización del barru de pintures nun amiestu asfálticu y un sensor pa la predicción de la formación d'óxidu

La Compañía Windar plantegó dellos retos a equipos d’investigación de la Universidá d’Uviéu y escoyó a dos proyectos de los cuatro presentaos. Ún de los problemes a resolver ye’l del barru de pintura, residuu industrial peligrosu resultáu de l’aplicación del recubrimientu nes torres eóliques. El so tratamientu supón un impactu mediuambiental na fabricación.

La propuesta de los investigadores de la Universidá d’Uviéu ye inxertalos en matrices asfáltiques pa capes de rodadura de carreteres, pa evitar asina’l so tratamientu, pudiendo sustituyir parte del betún asfáltico. Esta valorización podría amenorgar hasta un 18% l’impactu ambiental.

L’otru proyectu ganador desendolcó un sensor virtual pa la predicción de la formación d’óxidu de corrosión por condensación en materiales y productos. Por exemplu, si una cabina de pintura d’unos 42 metros de llargu por nueve d’altu necesitó usar un deshumidificador el día enteru, con esti sistema podría reducir el so usu un 30%, lo que supón un aforru de 15.000 euros, con una amortización de la inversión en dos años.

Ye una iniciativa público-privada impulsada pol Institutu de Desendolcu Económicu (Idepa), cola collaboración de Windar Technology. Un programa qu’ayuda a la formación y l’atracción d’inversiones.

Los ganadores de les primes recibirán 30.000 euros caún, pal desendolcu de los sos proyectos.