Foro pide a Barbón que sofite activamente a Duro Felguera pa evitar el so pieslle

La compañía sigue negociando cola banca pa reestructurar la so delda financiera

Foro pidió esti vienres al presidente del Principáu, Adrián Barbón, que nun quede colos brazos cruzaos énte la crisis financiera y de liquidez qu’atraviesa Duro Felguera y que sofite activamente al grupu industrial asturianu pa evitar el so pieslle.

Duro Felguera comunicó a la Comisión Nacional del Mercáu de Valores que sigue negociando cola banca acreedora pa reestructurar la so delda financiera.

Pal diputáu de Foro Pedro Leal, el nuevu gobiernu del Principáu "tien el deber d’usar urxentemente los instrumentos políticos y económicos" al so algame pa evitar el pieslle de la empresa más antigua del IBEX español.

Recordó nun comunicáu que la sede de Duro-Felguera nun ta en Londres nin en Pittsburgh sinón en Xixón, que’l so accionariáu y acreedores nun son estranxeros sinón españoles y que poro, "ye inesplicable la pasividá de Pedro Sánchez y sedría más inesplicable la d’Adrián Barbón"

Na so opinión, si nun s’evita’l concursu d’acreedores y se facilita la liquidez afayadiza pa sacar alantre la cartera de pidíos, sedrá tarde pa la viabilidá futura de Duro-Felguera, y convertiráse en "otru episodiu más de la desertización d’Asturies".