Edificios universitarios, primer opción p'axuntar les sedes xudiciales

La Viceconseyera nun descarta otros llugares, como'l centru cívicu

El Principáu confía en llegar a un alcuerdu cola Universidá pa utilizar la facultá de Formación del Profesoráu o la de Ciencies pa la xuntura de les sedes xudiciales d’Uviéu na contornada de Llamaquique. Nuna entrevista a TPA, la Viceconseyera de Xusticia nun descarta otres opciones, como’l centru cívicu, pero recalca que la so primer opción ye la Universidá.

Tres son les facultaes que’l Colexu d’Arquitectos analiza nel so informe sobre la xuntura de les sedes xudiciales d’Uviéu: la de Xeoloxía, la de Formación del Profesoráu y la facultá de Ciencies. La opción preferida del Principáu, pol númberu de metros, ye la facultá de Xeoloxía, pero descártenla cuasi dafechu pol interés que nella tien la Universidá.

Ente los otros dos edificios habría metros pa reagrupar les sedes espardíes, anque recalquen que tamién se necesita espaciu pa medrar.

Dende la Conseyería de Ciencia y Universidá negóciase col Rectoráu pa buscar la meyor solución.

Otra de les posibilidaes sedría’l centru cívicu, que tien posibilidá de medrar n’altura. De lo que nun se pue falar, enagora, aseguren, ye del costu de la reunificación.

Nun descarten tampoco buscar otru sitiu, nel casu de que nun haya solución en Llamaquique.