Educación axudica la redacción del proyectu del futuru Centru d'Anovación en FP de La Llaboral

Nun sedrá un centru escolar al usu, sinón un espaciu dedicáu a la dixitalización y la industria 4.0

El futuru Centru d’Anovación en FP d’Asturies asitiaráse nuna nave de 1.642 metros cuadraos útiles asitiada na parte trasera de La Llaboral. Centru d’Arte, Creación Industrial y Promoción Cultural, en Xixón, que foi cedida pola Conseyería de Cultura a la d’Educación.

El pabellón, que cunta con una entrada independiente y entrada directa dende un aparcaderu, ta en bon estáu de caltenimientu y dende’l mes de xineru foi usáu pola Universidá d’Uviéu como sede pa la celebración d’esámenes.

La Conseyería d’Educación acaba d’axudicar la redacción del proyectu de remocique d’esti espaciu, asitiáu en plena Milla del Conocimientu de Xixón, por un importe de 14.800 euros y con un plazu de fechura de tres meses.

La conseyera d’Educación, Carmen Suárez, y el director xeneral d’Enseñances Profesionales, Javier Cueli, visitaron güei la nave y adelantaron les exes fundamentales que se trabayarán nesti proyectu, que tará abiertu a la collaboración ente los centros y les entidaes privaes.

El modelu que se desendolcará sedrá asemeyáu al afitáu n’otres comunidaes. Nun ye un centru escolar al usu, sinón d’un espaciu dedicáu a la investigación y a l’actualización del conocimientu.

Los campos nos que s’especializará’l Centru d’Anovación en FP inicialmente son la dixitalización y la industria 4.0, según la Conseyería, qu’optó por estos ámbitos tecnolóxicos al considerar que la comunidá cunta con empreses con conocimientu y esperiencia abonda pa sumase a la iniciativa y exercer un efectu tractor n’actividaes venceyaes a l’automatización, la sensórica y la conectividá instrumentación industrial.

El centru trabayará na anovación tecnolóxica de la FP, entendiendo l’anovación como camudar los procesos pa convertilos en más eficaces y eficientes.

El proyectu tamién inxerta l’anovación metodolóxica na FP polo que dotará al profesoráu de les ferramientes afayadices pa preparar al alumnáu pa que seya quien a adaptase a los cambeos que se van producir na so vida llaboral.

La so función consistirá n’inxertar nuevos recursos a la xera docente pa potenciar nel alumnáu les habilidaes que demanden les empreses: competencies dixitales, trabayu n’equipu y collaborativu, lideralgu o xestión del tiempu, etc.

La tercer llinia d’anovación que s’impulsará dende’l centru de Xixón pasa pola cooperación coles empreses porque la FP dual tamién pue asitiase dientro d’esti marcu de collaboración, nel que tanto los centros como les empreses y entidaes collaboradores de les alministraciones públiques tendrán un espaciu d’alcuentru. ​