El 14 d'avientu abre'l plazu pa escoyer los viaxes del Imserso

Ensin restricciones, más allá de les impuestes pola comunidá de destín

A partir d'esti llunes, l'Imserso empieza a unviar les cartes de los viaxes 2021-2022. Una temporada que llega con delles novedaes, como l'amenorgamientu de la estancia de los viaxes de mariña de 14 a 10 díes, y ensin restricciones covid, más allá de les impuestes por cada comunidá.

Vuelven los viaxes del Imserso dos años dempués con dellos cambeos y un retayu de places. Son un 20% menos. Va dos años, n'Asturies ufiertáronse 27.000. Agora van ser ente 2.000 y 3.000 menos.

Ente les novedaes, un sistema de puntuación nel que se van tener en cuenta los ingresos pa favorecer a los xubilaos que menos viaxaren o tengan menor poder económicu. Tamién s'amenorga la estancia nos destinos de mariña y islla.

Esta convocatoria trai un retrasu de dellos meses pola pandemia. N'años anteriores, n'ochobre yá podía viaxase. Precisamente, les axencies de viaxes y la patronal hotelera llamentaron la tardanza na tramitación y axudicación del programa de viaxes.

La convocatoria del Imserso nun recueye nenguna restricción en rellación a la COVID-19. Nesti casu, va haber que prestar atención a les midíes adoptaes pola comunidá de destín.